Trobada Fabloggers 2007

A la fin Mensachero conseguirá o que quereba dende fa tiempo, y a trobada de bloggers en aragonés se fará reyalidat iste biernes 28 a las 20h00 d'a tarde en o bar A gramola -Concepción Arenal 10, por a unibersidat-. Mui buena organizazión, buen bideo de propaganda, una web mui cudiada y más que más una ilusión, una ideya que fará onra a l'aragonés: a unidat, a nobedat, os nuebos camins por recorrer.

Fa más de 2 años que yo prenzipié en iste mundo d'os blogs, y nunca pensé que plegaría o día que una comunidat de bloggers, lectors y chen amanada a l'aragonés en Internet se podese chuntar ta charrar. Confirmo a mía asistenzia (encara que no sé cuanto rato por atro compromiso) y tos espero beyer-ie a toz.

Enhorabuena por tot. Ixe biernes será un buen día ta l'aragonés en Internet. Grazias en gran parte a Mensachero.

Ta saber-ne más: http://trobada.blogdns.net/

PD. Tos recuerdo que "blog" en aragonés se pronunzia /blok/ y blogger 'bloguer'. O plural de blog > blogs se pronunzia /bloks/. ¡¡No lo pronunziez nunca con "j" /x/. !!

Nuebo blog en aragonés: Fendo huellos

"Fendo huellos" ye como me quedé en beyer iste nuebo blog con bellas semanas de bida. Dende aquí un saludo mui gran, m'encanta a tematica, a calidat de l'aragonés y a defensa d'as minorías -en iste caso no pas lingüisticas sino naturals- que se i fa. En bella mida compartimos muito os dos blogs. Animo y a continar como has feito dica agora, Alberto. Por zierto, qué buen detalle ixe títol en grafía de l'aragonés mediebal! Encara soi esperando notizias d'a fauna de Gallocanta...

Un saludo.

Cursos d'aragonés

Torna o curso y con él os cursos d'aragonés. Asinas lo podez comprobar en atros blogs mui interesans como Estricalla, Tierras de barrenaus, etc. Iste año continará a ufierta regular d'asoziazions y entidaz como pocas nobedaz. Entre ellas destacaremos posibles cursos a distanzia y seminarios ofizials ta profesors d'institutos y colechios, pero ixo mereixerá una nueba entrada. Por agora nomás tos recuerdo que si tos fa una mica de ganas de millorar o buestro aragonés u aprender-lo nomás ez d'apuntar-tos a istos cursos (con orarios y periodizidat de tot, no i hai excusa) y dito y feito, podrez saber una luenga más con un mundo cuasi desconoixiu a o suyo arredol.

As asoziazions que mayoritariamen fan cursos en a capital aragonesa son Nogará y Ligallo de Fablans. Tamién se fan cursos en atras localidaz por asoziazions más chicotas u por istas mesmas, asinas que nomás ez de preguntar u mesmo proposar.

Tos recuerdo tamién que s'amana o conzierto que fará Ligallo de Fablans por o suyo 25eno cabo d'año. Será un conzierto unico con un buen cartel y mosica aragonesa d'a buena en aragonés. No tos lo podez perder. Ta saber-ne más, tos remito a la web d'o Ligallo -por zierto, fa goyo a nueba imachen, ya caleba!-.

Euskaltzaindia y Academia de l'Aragonés

Tornamos d' berano cargaus de muitas notizias que ufrir-tos. Ista begada ye a nota de prensa d'a reunión que l'Academia de l'Aragonés ha manteniu con a basca -Euskaltzaindia-. Tot un reconoiximiento entre academias y pareixe que un futuro prometedor de colaborazions:

"Una delegazión ofizial d’Euskaltzaindia (Reyal Academia d’a Luenga Basca) compuesta per Xabier Kintana Urtiaga, secretario, y per José Luis Lizundia Askondo, tresorero, se reunió o pasau biernes 7 de setiembre en Zaragoza con cualques representans de l’Academia de l’Aragonés, entre els o suyo presidén, Manuel Castán Espot, con l’obchetibo d’estudiar formulas de colaborazión entre as dos instituzions lingüisticas.
L’Academia de l’Aragonés, naxida de fa poco más d’un año endentro d’o II Congreso de l’Aragonés y con boluntat de estar l’autoridat lingüistica d’ista luenga, tiene sin duda un referén en as atras academias españolas, ya que contan con una larguiza esperienzia, que en o caso d’a basca ye ya de nobenta añadas, y que puede fer muita onra ta o caso de l’aragonés. Per ixo, Manuel Castán querió esprisar un agradeximiento espezial a Euskaltzaindia per a iniziatiba de promober ista reunión con a más choben d’as academias.
En a reunión se tratoron tanto aspectos lingüisticos, entre els a codificazión, como soziolingüisticos, muito importans dada a situazión de frachilidat en que encara se troba l’aragonés, y s’acordó de siguir mantenendo contactos continos que concreten a colaborazión."

Ta saber-ne más: Academia de l'Aragonés y o foro Ziber-Rufierta.