Buen año

Espero que toz pasez un buen año 2007.

Sé que entre nusatros ya tenemos a ninos y bebés que fablarán un buen aragonés en bels años, ta éls, en espezial, ye ista felizitazión.

Un saludo a toz!

Con a mirada en os bezins

Ya fa tiempos que benimos comentando as tantas y tantas begadas que o Gobierno d'Aragón ha dito de fer bella cosa d'importán por l'aragonés. Espero que ista no sía una atra begada d'as que a la fin no ha quiesto rematar.

Ayer, 27 de deziembre, como ez leyiu en os periodicos, Eva Almunia comentó a posibilidat, en a charrada que fazió en Camara de Comercio de Zaragoza, de fer un poder por as luengas minorizadas igual como se fa en atras comunidaz.

Asinas, con o prezedén d'atras escuelas bilingües pribadas en Cataluña, Euskadi, Occitania o Galizia, fer un rete d'istos zentros por tot Aragón. Ta o que ya s'han presupuestau bels 60.000 € en a primera fase.

Os problemas que le trobo son:
1) que a la fin o gobierno no faría cosa, pues son escuelas pribadas que pagan os pais.
2) que abrían de pagar-lo, cuasi tot, os pais, cosa que ye imposible cuan i hai pocos zagals como pasaría en istas escuelas aragonesas en aragonés (en o catalán d'Aragón igual ye más posible por a suya requesta).
3) que ixo aon millor se podría fer con l'aragonés ye en Zaragoza, pues no sé cómo se podría fer en o Norte ni a resta d'Aragón sin conzienziazión ni ninos que i pueda ir.
Pareix que piensan de prenzipiar con a triga de profesorau ya iste año, asinas como o sondeyo d'alumnos, ta, en un año (2008), tener-las treballando.

As reaczions las ez puesto beyer güe en os periodicos... sin comentarios.

[Buen día d'os inozens... :)]

Buen Nadal

Dende O Chemeco d'as Parolas tos deseyamos un mui buen Nadal y año nuebo. Espero que podaz sentir o esprito d'as tradizions aragonesas, aon más fuerte se troba o recuerdo de l'aragonés, y o esprito d'o cambio y d'a nobedat d'un 2007 aon l'espera un buen futuro a la nuestra luenga.

- ¿Qué ye Nadal?
- Ye ilusión.

Charrada Academia de l'Aragonés

'Unibersidá Coleutibo Aragonesista' ha organizau a charrada ta iste chuebes día 21 en a Casa d'o Estudian, en a Carrera Corona d'Aragón, debán d'o instituto con o mesmo nombre, a las 7.30 d'a tarde, una charrada sobre l'Academia de l'Aragonés. Istoria, prochectos, organizazión, obchetibos... Farán a charrada o suyo secretario, Fernando Sánchez, y o suyo tresorero, Juanjo Lagraba.

Tos recomiendo que i baigaz, pues ye un buen momento ta ir enterando-se d'instituzions tan importans ta ista luenga como a suya Academia.

Tos deixo a pachina d'iste coleutibo con buena cosa d'importanzia en a nuestra unibersidat y que ye fendo muitas cosas por l'aragonés. I podez beyer amás o cartel d'istas chornadas.
Unibersidá Coleutibo Aragonesista

Rebista O Espiello

Como podez beyer en atros blogs como Estricalla! u en a pachina web de Nogará, i hai un nuebo O Espiello en a carrera.

No tos boi a contar as cosas que i hai ni os articlos y reportaches que, por zierto mui buenos, tos podez trobar ista begada; pues ixo lo podez mirar en atras partes u cuan lo merquez.

Tos boi a contar agora que toda ixa rebista ye feita grazias a personas como Chusé Ramón Barrios, l'alma d'a rebista que agora s'encarga de cuasi tot: enrestir a articulistas, planificar chunto con a resta d'o cosello de redaczión a estructura, organizar as subvenzions, nimbiar-lo a maquetar, distribuyir-lo... Chusé Bolea, qui la maqueta y la para ta imprentar, a Colla de Lingüistica de Nogará, coordinada por Chorche Díaz que mira de endrezar una mica l'aragonés d'as seczions sin autor y que repasa atros articlos, os miembros d'o Consello de Redaczión como Oscar, Sergio, Pilar, Rubén u Fernando que fan un treballo tamién mui importán... Os antigos miembros d'o consello de redazión y empentadors, os colaboradors que i nimbían articlos, resumens, entrebistas, reportaches, relatos... (y tamién os compradors!)

Muita chen que fa posible que un numeret d'una rebista feita por una asoziazión como Nogará sía ixo que ye: una referenzia en cuanto a publicazions periodicas.

Amás, ista begada ye un espezial con muita informazión d'o II Congreso de l'Aragonés. Tos animo a leyer-lo. Tos ferá goyo.

Premio Literario Cleto Torrodellas (2003 i 2005)

Esta begada ye nobedat o libro que replega os 4 relatos millor baloraus d'o Premio Literario Cleto Torrodelas, combocau por l'Ayuntamiento d'Estadilla y l'Asociación Cultural L'Aurora. Publicau por Xordica en a coleczión Simién Negra.

Ixa pena que afoga ye o relato d'a estadillana Elena Chazal, periau en 2003. Ye un relato mui crudo que cuenta os problemas que tiene una muller cuan se queda biuda y, soleta en o suyo lugar, ye biolada. Reyalismo, crudeza, desesperazión y muita crueldat fan d'iste cuento un duro reflexo d'un pensamiento ya, por suerte, oblidau. L'alma voladera de Benjamín Palazuela ye o relato que consiguió l'accesit 2003. Ye feito por o barzelonés Xavier Bayle, qui nos cuenta a istoria d'un ombre que tiene un grau problema: a suya alma no para de creixer, cosa que le fa lebitar. Ye un relato que, con toques de fantasía y buena umor nos fa pensar en os problemas d'a obesidat, de l'oblido y de tener l'alma masiau "boladera"!

La casa los telaires ye l'aczesit 2005 d'o fonzense Juan Carlos Marco. Un mui buen relato que chuga con o pasau mediebal de ribagorza ta fer que en l'actualidat se chunte o propietario d'una casa d'un lugarón con o propietario que tenió fa 500 años. Ye un azierto en o tema y en a forma que le permite de fer un relato que seguro que tos fa goyo. Tamién ye d'iste autor, Juan Carlos Marco, o relato ganador de 2005: La señorita Rosario. Un relato que, personalmen, ye d'os millors que he leyiu en aragonés en zagueras. Trata d'una carta que le nimbía un ombre a Beatriz, una antiga compañera de clase con qui encara fa parla. Nos cuenta o biache que fa él enta o suyo lugar y o que siente y se troba cuan torna a dentrar en o suyo colechio de ninos: os profesors, as remeranzas d'os compañers, fotos... Toda una alfaya de cuento que chuga con temas actuals con temas pasaus, amés de con l'amor.

En resumen, un libro aon tos podez trobar bel par de relatos que son mui interesans y que tos farán muito goyo. Tot en grafía propia, que amés ye más adecuada que no ista que foi serbir agora ta una luenga como l'aragonés. Esperaremos a dezisión de l'Academia ya con ganas...
Si i hai una cosa que he de resaltar d'o libro ye o suyo esprito, en cheneral de buscar a unibersalidat d'a literatura en aragonés.

Presentazión libro Reloch de pocha

Tos copio a nota que han nimbiau por a presentazión d'o libro de Chusé Inazio Nabarro:

"Ola!,

Tos femos saber e tamién tos combidamos á la presentazión d´o libro Reloch de pocha, de Chusé Inazio Nabarro, que se ferá maitín, martes 12 d´abiento, á las 20 oras en la Librería Anónima de Uesca (carrera Cabestany,19). Ista obra, que ye estata publicata por a editorial Gara d'edizions, otenió lo premio d´a IV edizión d´o Premio de Nobela Curta ziudá de Balbastro (2006).

Esprisions,

Chesús Á. Giménez Arbués,

Secretaire d´o Consello"

Rosario Ustáriz publica nuebo libro

L'autora chesa Rosario Ustariz presenta o suyo nuebo libro "Miquetas de l'alma" o día 16 de deziembre en Lo Pallar d'Agustín d'Echo grazias a l'Ayuntamiento d'Echo y l'asoziazión Bisas de lo Subordán.

Podez leyer un polido poema suyo premio Onso de Oro de poseía chesa e 1994 aquí.

A beyer cuan lo podemos leyer por aquí abaixo, que seguro que ye mui bien.
Un saludo y enhorabuena por a notizia.

Monografico de l'aragonés en Radio 5

Iste chuebes día 7 de deziembre, en a canal de radio nazional Radio 5 Todo Noticias se fará un monográfico de l'aragonés.
Se trata d'una serie de programas de 5 minutos que dica agora charraban d'as diferens luengas d'España contactando con l'academia basca, gallega y o Istitut d'Estudis Catalans. A buena notizia ye que dende agora s'adibirán dos luengas más: asturiano y aragonés.

Ta ixo, han contactau con as dos academias, en o nuestro caso con o secretario Fernando Sánchez. O monografico, emitiu a nibel nazional, se fará iste chuebes a las 11:05 u 12:05, depende de cómo tiengan l'orario. Amás, se repetirá de nueis u a las 9:45 u as 10:00.

O benién programa se fará o 4 de chinero en os mesmos orarios, y tratará de Nadal. Alabez ya i farán parte todas as luengas.