Charrada: os usos de "de" en aragonés

Güe, día biernes, de 7 a 9, Fernando Sánchez miembro de l'Academia y sozio de Nogará, ha feito en dita asoziazión una charrada sobre os emplegos de "de" en aragonés, combocada por a Colla de Lingüistica de dita asoziazión coordinada por Chorche Díaz.

O repaso ha abordau dende a sincronía de toz os dialectos y os suyos emplegos dica bels puens con l'aragonés mediebal. Amás, contando con a presenzia d'atros academicos y maternos, s'ha puesto enantar una miqueta enta una millor comprensión d'os suyos emplegos y a demostrazión de que dialectos tan extremos como o cheso y o ribagorzano campés fan parte d'una estructura sintactica común.

Emplegos relazionaus con a clitización y dislocazión, con a introducción d'infinitivos que fan funzions de Sucheto, u de C. Dreito de berbos de boluntat, deseyo u intenzión; amás d'una somera disposizión d'a suya funzión partitiba, d'a suya existenzia en locuzions preposizionals, en perifrasis, etc. Fan que aiga estau una charrada mui mui interesán y que toz os chobens que i han estau seguro que en abrán puesto aprender muito.

Cuento que se farán más charradas en istos meses tamién mui importans, asinas que ya tos n'iré informando...

Tos recuerdo que iste sabado día 25 se fan as IV Lecturas en aragonés en o Centro Joaquín Roncal, en a carrera san Braulio dende as 5 dica as 8. Ye un acto unico y que gosa tener muita requesta, asinas que tos animo que i baigaz.
Un saludo.

IV Leuturas en aragonés

Como toz os años, ista begada torna a fer o Ligallo de Fablans de l'Aragonés uno d'os millors actos literarios en pro de l'aragonés.

Yo i he iu dos begadas antes, y a berdat que me fazió goyo de beyer a personalidaz como o Chustizia d'Aragón, u o Rector d'a Unibersidat de Zaragoza mirando de leyer en lengua aragonesa. Tamién i leyen representans de partius politicos, meyos de comunicazión, ninos, mosicos, escritors, asoziazions, y tot qui aiga puesto, quiesto, y siu combidau.

Gosan comenzipiar con una conferenzia, iste año ye d'o mosico Luis Miguel Bajén 'Sobre a mosica de tradizión popular' ta continar con as lecturas. Cada partizipan leye un texto de bels 3 u 4 minutos de cualsiquier libro escrito en aragonés, asinas que tot dura bel par d'oretas u asinas. A prensa y meyos de comunicazión siempre en fan reseñas, cosa que ye d'agradeixer porque no nomás i partizipan leyendo sino que tamién lo fan escribindo a notizia.

Iste año pareixe que i charrará amás d'a chen que ya son una grata tradizión, miembros de l'Academia. Tot un ebento en o mundo cultural de l'aragonés que no se puede perder.
A zita ye:

DIYA: Sabado, 25 de nobiembre

PUESTO: Zentro Joaquín Roncal (Fundación CAI) C/. San Braulio

ORA: entre as 17 y as 20 oras

CONFERENZIA. Luismi Bajén (Biella Nuei) que charrará sobre a mosica de tradizión popular.

PARTIZIPANS CONFIRMAUS DICA AGORA: Felipe Pétriz, Juanjo Vázquez, Nieves Ibeas, Sergio Larraga (PAR)) Academicos (Manuel Castán, Pilar Benítez, Fernando Sánchez, Chusé Aragües ...) representans de meyos de comunicazión (RNE, Onda O, QUE, Cadena SER, Aragón Radio ...) Mosicos (PRAU, Mª José Hernández, Ricardo Constante, Dúo Recapte) Asoziazions (Nogará, l'Airón, REA...) y belatros á ran particular.

Y como cuentan en os comentarios:
A las 20.00, en o Auditorio Municipal de Zaragoza (Sala Luis Galve), conzierto "20 años de fabirol" (entradas antizipadas en caixers CAI)... Asinas que tarde completa!

Bueno, perdón por no actualizar o blog en zagueras, ya sabez que i hai epocas en l'año que uno no puede fer-lo guaire asobén. Encara tiengo que fer o resmune d'as Jornadas d'a Unibersidat en a Institución Fernando el Católico sobre as lengas d'Aragón!

Un saludo a toz y enorabuena y grazias a o Ligallo de Fablans (a toz que en far parte y en espezial a Feli, o presidén) por fer atra begada ista trobada literaria en aragonés.

Literatura en aragonés

En zagueras i hai buenas nuebas sobre a literatura en aragonés actual y tamién sobre a cultura d'Aragón.

O XI Premio Ana Abarca de Bolea, combocau por o Consello d'a Fabla Aragonesa, lo ha ganau iste año l'autor Fabián Castillo Seas naixiu d'Alquezra con a suya obra Traquitos de bida e muerte.
O churau compuesto por Chorche Escartín, Chusé Inazio Nabarro y Francho Nagore estima que por a calidat tanto estilistica como lingüistica en os poemas, como por a profundidat con a que afronta a bida son os motibos por os que ha d'estar o ganador.

L'accesit ye ta Ana Tena Puy, miembro de l'Academia de l'Aragonés, naixida de Graus y ganadora de cuantos premios literarios en aragonés. Ista begada l'accesit ye por a suya obra Como minglanas.

Ta saber-ne más: Amelia (con un repaso por a obra de Fabián Castillo) y RadioHuesca.com.

O II Concurso de relatos en Aragonés 'A Enrestida' lo ha ganau Diago Lezaun Romero con o suyo relato A carrachina que podez leyer en o blog de dita asoziazión: A Enrestida.

Tamién ye ocasión de fer-se eco d'una feria que se inaugurará o biernes 10 de nobiembre en Zaragoza de 19 a 22h d'a tarde. Ye "AMOSTRANZA 06", muestra d'educazión cultural aragonesa con un amplo y bariau programa d'actibidaz y actuazions dica o domingo. Tot en a Carpa d'a Plaza d'o Pilar, d'entrada libre. Ta saber-ne más aquí, en a Ziber Rufierta, u en o telefono 976724000.

Ala, ya tenemos más cosas a leyer en aragonés y que regalar ta bella ocasión espezial. Enhorabuena a os ganadors y a o Conzello de Zaragoza por ista nueba feria!