Plego de rezibir ista nota de prensa de l'Academia de l'aragonés: "L'Academia de l'Aragonés, achuntada en Zaragoza en sesión estraordinaria, ha nombrau a os suyos primers miembros d'onor. Istos nombramientos obedexen a que l'Academia quiere contar entre os miembros suyos con a esperienzia y o conoximiento de personas destacadas por a suya larga trachectoria, cadaguna en la suya aria, en fabor d'a luenga aragonesa. Os nuebos academicos d'onor, que ya han confirmau l'azeptazión d'o cargo, son os siguiens: Brian Mott, Artur Quintana i Font, Juan José Guillén Calvo, Nieus Luzía Dueso Lascorz y Rosario Ustáriz Borra.
Brian Mott ye doctor en Filolochía Romanica Ispanica y profesor d'a Unibersidat de Barzelona. Entre a suya obra merex a pena acobaltar, respetibe a l'aragonés, a suya tesis doctoral sobre a fabla de Chistén y o suyo diczionario etimolochico d'o chistabín. D'atra man, Artur Quintana ye doctor en Filolochía Romanica y miembro d'o Institut d'Estudis Catalans. Antimás d'estudioso d'o catalán d'Aragón, en ye tamién de l'aragonés y luego publicará o suyo estudio sobre una d'as suyas bariedaz, l'aragonés de Ballibió. En cuanto a Juan José Guillén, cal destacar que ye, asinasmesmo, doctor en Filolochía por a Unibersidat de Zaragoza y espezialista en toponimia d'a Bal de Tena, asunto sobre o que trata a suya tesis doctoral. De zaguero, Nieus Luzia Dueso y Rosario Ustáriz son dos d'as más grans figuras literarias que tiene l'aragonés en as suyas bariedaz chistabina y chesa respectibamén. A primera ye autora, entre atros, d'o libro de poesía A'l canto'l Zinqueta y d'o de prosa Leyendas de'l Alto Aragón y a segunda d'una graniza obra poética replegada en un bolumen publicau fa poco baxo o títol Miquetas de l'alma.
Toz os nuebos miembros d'onor de l'Academia de l'Aragonés serán omenachiatos en o prosimo pleno d'a mesma, prebisto ta o 30 de chunio en Piedrafita de Tena."
Enorabuena a os nuebos miebros d'onor de l'Academia. Dende O chemeco d'as parolas tos animamos a que continez fendo o buen treballo por l'aragonés que diga agora ez feito. Un saludo mui mui espezial a Luzía Dueso y Brian Mott. Espero beyer-tos luego.
5 comentarios:
Soi Beatriz d'a universidat.
Un dia que miro pachinas web de lingüistica y he trobau iste tuyo blog que, de berdat, me fa muito goyo.
Enorabuena por istas tuyas notizias de lingüistica y literatura muito interesantes,
Un saludo
Ista tardi en o programa de radio MOSICA Y PAROLAS charrare de ista notizia.
Podez sentir lo programa por internet en http://www.radiolagranja.org/escucharadiomai/
de 19.30 a 21.30 nuebo orario
a plantar
Por zierto, parlando d'academicos, "Abargal", l'autor d'o blog "O Cantaire" también tiene un otro blog sobre lo cheso: http://www.locheso.blogspot.com/
que me paix que no lo tiens enlazau.
La web de remenches carbura atra begada.
A direzión ye :
http://remenches.blogia.com/
Buena nuit!
Beatriz, fa onra de leyer ixas parolas en aragonés, prou que pareix que has feito un buen trobo, agora a continar aprendendo.
jv, m'alegra muito que pa o tuyo programa faigas serbir notizias de l'aragonés y tot, ye mui majo!
jp, no teneba ni ideya que existise ixe blog, nomás sabeba de Lo cantaire de Ciresa. Ya tiene un binclo en iste blog, amás con muito goyo!
anonymus, qué barbaridat, encara más blogs! y iste que rebiscola ye uno d'os millors!!! m'encantan as nuebas notizias CUÁNTO SE'N APRENDE!
muitas grazias a os cuatro por as buestras aportazions, a beyer si l'aragonés contina creixendo con todas istas notizias tan positibas que nos trobamos en zagueras!
Post a Comment